“Azərkosmos” 2019-cu ili 3,62 milyon manat mənfəətlə başa vurub

“Azərkosmos” 2019-cu ili 3,62 milyon manat mənfəətlə başa vurub

“Azərkosmos” açıq səhmdar cəmiyyəti 2019-cu ilin yekunlarına dair maliyyə nəticələrini açıqlayıb.

“Azərkosmos” ASC-dən “Azeri Defence”yə verilən məlumata görə, səhmdar cəmiyyət 2019-cu ili 3,62 milyon manat xalis mənfəətlə başa vurub, şirkətin ümumi mənfəəti isə 14,04 milyona manat olub.

2019-cu ildə şirkətin gəlirləri 2018-ci il ilə müqayisədə 41,2% artıb, EBİTDA marjası 64%-dən 73%-ə yüksəlib. Bu artımda peyk xidmətlərinin əhatə coğrafiyasının və aparıcı beynəlxalq şirkətlərlə əməkdaşlığın genişləndirilməsinin də rolu olmuşdur. “Azerspace-2” peykinin istifadəsinə dair beynəlxalq şirkətlərlə əməkdaşlıq sayəsində “Azərkosmos”un lizinq əməliyyatları üzrə maliyyə gəliri 2018-ci ilə nisbətdə 2,6 dəfə artaraq 12,24 milyon manata çatıb.

Qlobal “Peyk Sənayesi Assosiasiyası”nın (Satellite Industry Association) məlumatlarına əsasən, son illərdə dünya peyk sənayesində “durğunluq” müşahidə olunur, dünya peyk sənayesinin gəlirləri 3% ətrafında artıb, sırf peyk xidmətlərinin göstərilməsi üzrə gəlirlər isə nisbətən azalıb. Bununla belə, “Azərkosmos”un gəlirləri stabil olaraq artmaqda davam edir və proqnozlara əsasən gəlirlərin növbəti illərdə daha da artacağı gözlənilir. Hazırda qüvvədə olan kommersiya müqavilələri üzrə növbəti dövrlər üçün 107,1 milyon manat gəlir təmin edilmişdir.

Ümumilikdə, “Azərkosmos”un gəlirlərinin 90%-i peyk xidmətlərinin dünyanın 20-dən çox ölkəsinə ixracından formalaşıb. 2019-cu ilin nəticələrinə əsasən “Azərkosmos” dövlət və qeyri-dövlət ixracatçı subyektləri arasında xidmət sektorunda ixrac həcminə görə ən yüksək nəticə ilə birinci yerdə qərarlaşıb. Şirkətin ixrac portfelini əsasən ABŞ, Böyük Britaniya, Fransa, Almaniya, Malayziya kimi dünyanın aparıcı ölkələrinin qabaqcıl şirkətləri təşkil edib.

Bunlarla yanaşı, 2019-cu ildə “Azərkosmos”un yığılmış zərəri 1,9% azalaraq 307 milyon manata düşüb. Bu məqamda xüsusi qeyd etmək lazımdır ki, qeyd edilən yığılmış zərər birbaşa “Azərkosmos”un əməliyyat fəaliyyəti ilə bağlı deyil, əsasən (85%) ötən illərdə baş vermiş devalvasiyalar nəticəsində manatın məzənnəsinin aşağı düşməsi və bu səbəbdən manatla hazırlanan maliyyə hesabatında mənfi məzənnə fərqinin əks etdirilməsi ilə əlaqədardır. Belə ki, Beynəlxalq Mühasibat Uçotu Standartlarının tələblərinə görə peyk layihələrinin maliyyələşdirilməsi üçün xarici valyutada cəlb edilmiş kreditlər üzrə öhdəliklərdə yaranmış mənfi məzənnə fərqi maliyyə hesabatlarında Azərbaycan manatı ilə texniki olaraq zərər kimi tanınmalıdır. Şirkətin mənfəət və gəlirlərinin artımı ilə bağlı tarixçə və proqnozlara əsasən, ümumi yığılan zərərin ən azı əməliyyat fəaliyyəti ilə bağlı hissəsi yaxın illərdə mənfəətlə əvəzlənə biləcək.

KATEQORIYA:
TEQLƏR
Bu xəbəri paylaş