Azərbaycan Silahlı Qüvvələrinin Yardım Fonduna daxil olan vəsait 1,5 milyon manat artıb

Azərbaycan Silahlı Qüvvələrinin Yardım Fonduna mayın 1-dək daxil olan vəsait açıqlanıb.

Müdafiə Nazirliyinin mətbuat xidmətindən “AzeriDefence”yə verilən məlumata görə, Azərbaycan prezidentinin 2002-ci il 17 avqust tarixli, 755 nömrəli Fərmanı ilə təsdiq edilmiş Silahlı Qüvvələrə Yardım Fonduna 1 may 2016-cı il tarixədək 73.095.369,76 AZN, 212.373,88 ABŞ dolları, 2993,69 avro və 5000,0 rubl vəsait daxil olub.

Fondun vəsaiti aprel ayı ərzində 1 milyon 566 min 216 manat artıb. Aprel ayında ilk dəfə olaraq Fondun Rusiya rublı ilə olan hesabına 5 min rubl vəsait daxil olub.

Xatırladaq ki, Azərbaycan Silahlı Qüvvələrinə Yardım Fondu Prezidentin 2002-ci il 17 avqust tarixli 755 saylı fərmanı ilə yaradılıb.

Fond Azərbaycan Silahlı Qüvvələrinin müasir tələblər səviyyəsində inkişafını təmin etmək, onun maddi-texniki bazasını möhkəmləndirmək və zəruri sosial tədbirləri maliyyələşdirmək məqsədilə yaradılıb. Fondun maliyyə mənbəyi Azərbaycan Silahlı Qüvvələrinin maddi-texniki və sosial bazasının möhkəmləndirilməsinə maliyyə köməyi məqsədilə Azərbaycanın ərazisində fəaliyyət göstərən hüquqi və fiziki şəxslərdən könüllülük əsasında daxil olan maliyyə vəsaiti və qanunvericiliklə qadağan olunmamış digər daxilolmalardır.

 

KATEQORIYA:
Bu xəbəri paylaş