Azərbaycan XİN Fransa və Böyük Britaniyanın Ermənistana silah satmasına münasibət bildirib

Azərbaycan Xarici İşlər Nazirliyi sosial şəbəkələrdə Ermənistan silahlı qüvvələrinin şəxsi heyətinin Fransa və Böyük Britaniya istehsalı olan “PGM Mini-Hecate” və “Arctic Warfare .338 LM” snayper tüfənglərdən istifadə etməsinin əks etdirən məlumatlara münasibət bildirib.

“AzeriDefence”nin məlumatına görə, XİN-in mətbuat xidmətinin rəhbəri Hikmət Hacıyev APA-ya açıqlamasında deyib ki, bu snayper tüfənglərindən istifadə edərək şəxsi heyətin atəş hazırlığı və təliminin aparılması onların kütləvi sayda idxal edilməsi və Ermənistan silahlı qüvvələrində silahlanmaya daxil edilməsini deməyə əsas yaradır: “İlkin olaraq, cəmi iki ədəd “Arctic Warfare.338 LM” snayper tüfənginin sınaq məqsədilə Ermənistana verildiyi bildirilsə də, Ermənistan silahlı qüvvələrində bu silahların geniş tətbiqi bunun əksini sübut edir.

Böyük Britaniya və Fransa istehsalı olan snayper tüfənglərinin Azərbaycana qarşı təcavüz və işğal törətmiş Ermənistan silahlı qüvvələrində silahlanmaya daxil edilməsi ciddi narahatlıq doğurur. Bu snayper tüfənglərinin Ermənistana ixrac olunması ilə əlaqədar hələ 25 aprel 2015-ci il tarixində Xarici İşlər Nazirliyi tərəfindən ifadə olunmuş narahatlığa baxmayaraq, silahın istehsalçısı olan dövlətlər tərəfindən onların hansı yolla Ermənistana ixrac edilməsi məsələsinə əsaslı aydınlıq gətirilməyib”.

H. Hacıyevin sözlərinə görə, Fransa və Böyük Britaniya ATƏT-in müvafiq qərarına uyğun olaraq, Ermənistan və Azərbaycana silah embarqosunun tətbiq edildiyini və bu embarqonun ölkə qanunvericiliyində təsbit olunduğunu bildirir: “Eyni zamanda Avropa İttifaqı çərçivəsində silah satışını tənzimləyən ciddi ixraca nəzarət rejimi mövcuddur. Bu silahların üçüncü tərəf vasitəsilə Ermənistana ixrac edilməsi barəsində olan fikirlər də sual doğurur. Belə ki, ixraca nəzarət rejiminə uyğun olaraq, döyüş silahlarının idxal-ixrac əməliyyatları zamanı ixrac edən tərəf son istifadəçi şəhadətnaməsi (end-user certificate) tələb edilməlidir.

İşğalçı dövlət olaraq, Ermənistana silah ixracı rəsmi Yerevanın Azərbaycana qarşı işğal və təcavüzünü davam etdirməsinə, mövcud status kvonun saxlanmasına xidmət edir, münaqişənin danışıqlar yolu ilə həll olunmasına və regionda sülh və sabitliyin bərqərar olmasına ciddi mane yaradır.

Ermənistan bu kimi snayper tüfənglərini döyüş məqsədilə ilə bərabər Ermənistan-Azərbaycan sərhədinə yaxın ərazilərdə yaşayan mülki insanları, o cümlədən qadın və azyaşlı uşaqları hədəfə almaq üçün də istifadə edir.
Ermənistanın müxtəlif yollar, o cümlədən saxta ticarət əməliyyatları və “qara bazar” vasitəsilə snayper tüfənglərini əldə etməsi snayperlərin təmas xəttindən çəkilməsi barəsində Ermənistanın irəli sürdüyü iddiaların və buna “etimad quruculuğu” donu geyindirməsi cəhdlərinin bir daha tamamilə əsassız və yalan olduğunu sübut edir.

Fransa və Böyük Britaniyanın üzərinə düşən beynəlxalq öhdəlik və milli qanunların tələblərindən çıxış edərək, bu məsələni ciddi surətdə araşdıracağına və zəruri tədbirlər görəcəyinə ümid edirik”.

Qeyd edək ki, bu gün Böyük Britaniyanın Ermənistana snayper tüfənglərini satmasına dair yeni faktlar ortaya çıxıb. Ötən ilin aprel ayında Böyükk Britaniyanın Azərbaycandakı səfirliyi “AzeriDefence”nin İngiltərədə yerləşən “Accuracy International” şirkətinin Ermənistana snayper tüfəngləri satması barədə xəbərini təkzib edərək bu ölkəyə 2 ədəd silahın Fransa şirkəti tərəfindən sərgi məqsədi ilə gətirildiyini bildirmişdi. Lakin həmin vaxt “Accuracy International” şirkətinin nümayəndəsinin “AzeriDefence”yə Ermənistana silahın Gürcüstanda yerləşən diler firma üzərindən satıldığını söylədiyini qeyd etmişdik.

Bu gün “Kontakt” sosial şəbəkəsində ermənilərə məxsus hərbi səhifədə Ermənistan Müdafiə Nazirliyinin ordu snayperlərinin Fransa istehsalı “PGM Mini-Hecate” və İngiltərənin adıçəkilən şirkətinin istehsalı olan “Arctic Warfare .338 LM” snayper tüfəngləri ilə təlimlərinin fotosu yayılıb. Ermənilərin paylaşımından bir daha məlum olur ki, snayper tüfəngləri Qarabağdakı hərbi birləşmələrin istifadəsinə verilib.

Bununla da ermənilər özləri Böyük Britaniyanın şirkətlərinin onlara silah satdığı faktını ifşa etmiş oldular.

 

KATEQORIYA:
Bu xəbəri paylaş