Naxçıvan FHN-ə yeni avtomobillər verilib

Naxçıvan FHN-ə yeni avtomobillər verilib

Martın 4-də Naxçıvan Muxtar Respublikası Fövqəladə Hallar Nazirliyinə yeni xidməti avtomobillər və avadanlıqlar təqdim olunub.

Bu barədə “AzeriDefence” “Nuhçıxan” agentliyinə istinadən məlumat verib.

Naxçıvan Muxtar Respublikası Ali Məclisinin Sədri Vasif Talıbov bu münasibətlə keçirilən tədbirdə iştirak edib.

Naxçıvan Muxtar Respublikasının Fövqəladə Hallar naziri, general-leytenant Şamı Abdullayev Ali Məclisin Sədrinə bildirib ki,  Fövqəladə Hallar Nazirliyinin maddi-texniki bazasının gücləndirilməsi məqsədilə Rusiya və Almaniya istehsalı olan 7 yanğınsöndürən avtomobil, eyni zamanda 2 xidməti minik avtomobili gətirilib. Yanğınsöndürmə avtomobilləri 3500 litr köpükəmələgətirən maye ilə təchiz edilib. Nazirliyə fərdi tənəffüs vasitələri, sınaq avadanlığı, yanğın nərdivanları, yanğınsöndürən və xilasedicilər üçün xüsusi geyim formaları və digər texniki vasitələr olmaqla 63 adda müxtəlif təyinatlı avadanlıqlar, eləcə də tibbi çadır verilib.

Tibbi çadır fəlakət ocaqlarında xəsarət alan insanlara ilk tibbi yardımın göstərilməsi üçün nəzərdə tutulub və lazımi şəraitlə təmin olunub.

KATEQORIYA:
Bu xəbəri paylaş