“Rostex” yenilənmiş Mi-35P helikopterin seriyalı istehsalına başlayıb
Rusiyanın “Vertolyotı Rossii” şirkəti (“Rostex” Dövlət Korporasiyasına daxildir) “Rostvertol” müəssisəsində yenilənmiş Mi-35P döyüş helikopterlərinin seriyalı istehsalına başlayıb.
Bu barədə Azeri Defence saytına “Rostex” Dövlət Korporasiyasının mətbuat xidmətindən məlumat verilib.
Mi-35P döyüş helikopterinin ilk prototipi performans xüsusiyyətlərini və dizayn dəyişikliklərinin düzgünlüyünü təsdiqləyən uçuş testləri proqramını tamamlayıb.
Şirkət mütəxəssislərinin sözlərinə görə, Mi-35P döyüş helikopteri Mi-24 ailəsinin ən yaxşı keyfiyyətlərini və Rusiyanın avionika sahəsindəki son inkişaflarını özündə cəmləşdirib.
“Ötən il Mi-35P döyüş helikopterini bir neçə potensial müştəriyə nümayiş etdirdik. Bu gün əminliklə deyə bilərik ki, bu helikopterə tələbat var. Xarici sifarişçi ilə bağlanmış ilk müqaviləyə əsasən Mi-35P helikopterinin seriyalı istehsalına başlanılıb”, – deyə “Vertolyotı Rossii” şirkətinin baş direktoru Andrey Boqinski vurğulayıb.
Qeyd edək ki, yenilənmiş Mi-35P döyüş helikopteri Rusiyanın Moskva vilayətində avqustun 23-dən 29-dək keçirilən “Armiya-2020” Beynəlxalq hərbi-texniki forumunda nümayiş etdirilir.