Zakir Həsənov ordu rəhbərliyinə tapşırıq verdi: “Düşmən təxribatlarına qarşı cavab tədbirləri görməyə hazır olmalıyıq”

Aprelin 23-də müdafiə naziri general-polkovnik Zakir Həsənovun rəhbərliyi ilə nazir müavinləri, Silahlı Qüvvələr və qoşun növü komandanları, eləcə də birlik komandirlərinin iştirakı ilə xidməti müşavirə keçirilib.

Bu barədə “AzeriDefence”yə Müdafiə Nazirliyinin mətbuat xidmətindən məlumat verilib.

Müşavirədə aprel ayının əvvəllərində Ermənistan silahlı qüvvələrinin təxribatları nəticəsində baş verən döyüş əməliyyatlarının nəticələri təhlil edilərək konkret tapşırıqlar qoyulub və tövsiyələr verilib. Toplantıda çıxış edən müdafiə naziri bildirib ki, Azərbaycan Silahlı Qüvvələrinin həyata keçirdiyi əks-həmlə zərbələri zamanı bölmələrin fəaliyyəti ölkə rəhbəri, Ali Baş Komandan İlham Əliyev tərəfindən yüksək qiymətləndirilib. Dövlətin və xalqın diqqət və qayğısı sayəsində ordu bu uğura nail olub.

“Ermənistan 20 ildən artıqdır ki, torpaqlarımızı işğal edib və ölkəmizə qarşı yeni ərazi iddiaları ilə çıxış etməkdən əl çəkmir. Bu ölkənin cinayətkar rejimi bütün beynəlxalq norma və prinsiplərə məhəl qoymur, hər bir imkandan istifadə edərək xalqımıza qarşı təxribatlar törətməyə çalışır. Bu istiqamətdə ermənipərəst qüvvələr də ölkəmizə qarşı təzyiqlərdən çəkinmirlər. Ermənilərin dinc əhaliyə və təmas xəttindəki yaşayış məntəqlərimizə qarşı törətdiyi son əməllərinə Ordumuz tutarlı cavab verdi. Vacib əhəmiyyətə malik yüksəklikləri azad edərək nəzarətə götürməklə cəbhəboyu zonada yerləşən yaşayış məntəqələrimizin təhlükəsizliyini tam təmin etmiş olduq. Bununla belə düşmən təxribatlarına qarşı cavab tədbirləri görməyə hər an hazır olmalıyıq. Şəhid ailələrinə və yaralılara hərtərəfli diqqət və qayğı göstərilməli, onların problemləri digər icra strukturları ilə qarşılıqlı əlaqədə həll edilməlidir”, – deyə nazir bəyan edib.

Z.Həsənov qeyd edib ki, döyüşlərdə Azərbaycan Silahlı Qüvvələri döyüş təcrübəsini təkmilləşdirərək şəxsi heyətin qələbə əzmini daha da yüksəldib. Eyni zamanda xalqı Orduya inamı artıb.

Müdafiə naziri Silahlı Qüvvələrin nəyin bahasına olursa-olsun ölkəmizin ərazi bütövlüyünün bərpa edilməsinə hazır olmasını şəxsi heyətin diqqətinə çatdırıb.

“Bunu bizdən dövlətimiz gözləyir və xalqımız tələb edir. Bunun üçün bütün imkanlarımz var. İqtisadi, maddi, hərbi, demoqrafik və digər sahələrdə ehtiyatlarımız düşməndən qat-qat üstündür. Əsgərdən tutmuş generaladək hər birimiz torpaqlarımızın azad edilməsi yolunda üzərimizə düşən vəzifələri layiqincə yerinə yetirərək döyüşlərə hazır olmalıyıq”, – deyə Müdafiə naziri qeyd edib.

Müdafiə nazirinin çıxışından sonra Azərbaycanın ərazi bütövlüyü uğrunda gedən döyüş əməliyyatları zamanı xidməti vəzifələrini layiqincə yerinə yetirən bir qrup hərbi qulluqçununn təltif olunması barədə dövlət başçısının müvafiq sərəncamları və müdafiə nazirinin əmrləri şəxsi heyətə çatdırılıb, təltif olunan hərbi qulluqçulara mükafatlar təqdim edilib.

Müşavirənin sonunda müdafiə naziri qoşunların döyüşə hazırlıq səviyyəsinin və idarəetmə orqanlarının fəaliyyətinin hərtərəfli yoxlanılmasına dair Baş Qərargaha müvafiq tapşırıqlar verib.

musavire1

musavire2

musavire3

musavire4

KATEQORIYA:
Bu xəbəri paylaş